මඩුවන්වෙල වලව්ව

අභීත ජාතික වීරයන්සේ වික්‍රමයන් පෑ පරපුරක් ලෙස මඩුවන්වෙල පරපුර පෙන්වාදිය හැකිය. ඓතිහාසික මඩුවන්වල වලව්ව අක්කර 20ක පමණ මනරම් භූමියක පිහිටා ඇත. උඩරට රාජධානි සමයේ සිංහලේ ස්වාධීනත්වය වෙනුවෙන් මහනුවර රාජධානියේ රජුට බල පුරුකක් ලෙස මඩුවන්වෙල පරපුර ක්‍රියා කරන ලදී. මහනුවර රාජධානියේ ආරම්භක සමයේ සිටම සිංහල රාජ්‍ය නායකයන්ට සමීපව කටයුතු කළ අභීත පරපුරක් ලෙස මෙම මඩුවන්වෙල පරපුර පෙන්වාදිය හැකිය.

 මෙම මඩුවන්වෙලට නින්ද ගමක් ලැබීම සඳහා මඩුවන්වෙල පරපුරේ මහ මොහොට්ටාලගේ වීරකම් ප්‍රධාන හේතු සාධකයක් විය. මඩුවන්වෙල වලව්ව අසල ඔතලයා නමින් ලන්දේසි මංපහරන්නෙකු සැඟවී සිටින්නට විය. එකල එම ඔතලයා උඩරට රජුට මහත් හිසරදයක් විය. එහිදී රජු තීරණය කරන ලද්දේ එම ඔතලයා මරා හිස රැගෙන එන අයෙකුට ගම්වරයක් ලබාදෙන බවයි. එම වික්‍රමය සාර්ථකව සිදුකළ මඩුවන්වෙල මහ මොහොට්ටාල විසින් මඩුවන්වෙල නින්ද ගමක් ලබා ගන්නා ලදී.

දෙවෙනි වරටත් නින්දගමක් ලබා ගැනීමට හේතු වූයේ සුදු ගෝනකු රජුට අල්ලා දීම් හේතුවෙනි. මෙලෙස ලබාගත් නින්දගම් දෙකෙහි එකතුව අක්කර  අසූ දෙදහසක් බව සඳහන් වේ. මඩුවන්වෙල පරපුරේ ජනප්‍රිය වීමට හේතු සාධකය වූයේ කන්ද උඩරට රජුගේ අණ පරිදි මහා දිසාවගේ මී මුත්තා විසින් ලන්දේසීන්ගේ කටුවන බලකොටුව විනාශ කර දැමීමයි. 

මඩුවන්වෙල මහ දිසාව  1844 සැප්තැම්බර් 11 වන දින උපත ලැබීය. මොහුගේ නම මඩුවන්වෙල විජයසුන්දර ඒකනායක අභයකෝන් කොඩිතුවක්කු මුදියන්සේලාගේ ශ්‍රීමත් ජේමිස් විලියම් මඩුවන්වෙල වේ. ලංකාවේ කළු කුමාරයා ලෙස ද හඳුන්වනු ලබයි. මඩුවන්වෙල වලව්ව ක්‍රි.ව  1877 -1905 කාල වකවාවකවානුව තුළ කාමර 121  මැද මිදුල් 21 සමන්විත විය. වර්ථමානය වන විට ද මහා දිසාව විසින් යුක්තිය පසිඳලීම සිදු කල අධිකරණ ශාලාව අදටත් දැකගත හැකි අතර එහි වූ සිර මැදිරිය ද අදට ද දැක ගත හැකිය. 1944 දී පමණ මෙය පුරාවිද්‍යා දෙපාර්තමේන්තුවට පවරා ගන්නා ලදී. ඉන්පසු දැනට ඉතිරිව ඇත්තේ අක්කර හය හමාරක් හා කාමර හතළිස් තුනක් හා මැද මිදුල් හතකින් යුතු වලව්ව පමණි.